ሐራ ዘተዋሕዶ
October 29, 2020
- “ጥያቄአችን ከአስተዳደር ችግር የመነጨ እንጂ ሃይማኖታዊ አልነበረም፤ አንዲት ቤተ ክርስቲያን ናት አሸናፊዋ፤ ቤተ ክርስቲያን አሸናፊ ከኾነች ኹሉም አሸናፊ ነው፤ በአንዲት ቅድስት ቤተ ክርስቲያን፣ በአንድ ቅዱስ ሲኖዶስ እና በአንድ ቅዱስ ፓትርያርክ ሥር ኾነን አገልግሎታችንን እንቀጥላለን፤ ሕዝባችንን እናገለግላለን፤ ያሳዘነውን እናስደስታለን፤
- እኛ የቤተ ክርስቲያን ከኾን፣ የኦሲኤን ቴሌቪዥን ጣቢያም የቤተ ክርስቲያን ነው፤ ቤተ ክርስቲያን፥ ኹለት ሦስት ብቻ ሳይኾን ብዙ ያስፈልጋታል፡፡”
/ሊቀ አእላፍ ቀሲስ በላይ መኰንን/
***
- “የልዩነቱ መነሻ፣ በችግሮች ላይ ሳይኾን በመፍትሔው ላይ ነው፤ በውይይት ለመፍታት ላለፉት ስድስት ወራት ምክክር ሲደረግ ቆይቷል፡፡ በመጨረሻም፣ በኦሮሚያ ያጋጠመውን የአገልግሎት መዳከም በጠቅላይ ቤተ ክህነት ሥር በሚቋቋም ጠንካራ አካል በኩል በአንድነት ለመፍታት የተሻለ እንደኾነ በኹሉም ዘንድ ታምኖበታል፡፡ በመኾኑም፣ በመጀመሪያ በቋሚ ሲኖዶስ፣ በመቀጠልም የቅዱስ ሲኖዶስ ምልአተ ጉባኤው ባጸደቀው መሠረት፣ የዕርቅ ሒደቱ ተጠናቅቋል፤
- በስምምነቱ እና በቅዱስ ሲኖዶስ ውሳኔ፥ የቤተ ክርስቲያን አሸናፊነት እንጂ የአንድ ወገን አሸናፊነት የለም፤ ቅዱስ ፓትርያርኩ እና ብፁዓን አባቶች፣ ልጆቻችን፥ እንኳን በደኅና መጣችኹልን ብለው ልዩነት በሌለው ቃል ለስምምነቱ ይኹንታ ሰጥተው ተቀብለውናል፤
- በአንድ የሰውነት ክፍል የሚፈጠር ሕመም የመላው አካል ሕመም እንደኾነው፣ በኦሮሚያ ያጋጠመው የአገልግሎት መዳከምም፣ የመላዋ ቤተ ክርስቲያን ፈተና ተደርጎ የሚወሰድ ነው፤ መፍትሔውም ኹላችንንም የሚመለከት ነው በኦሮምኛ ቋንቋ የሚሰጠውን አገልግሎት፣ እጅግ በተጠናከረ መልኩ ለማካሔድ፣ ኹሉም የቤተ ክርስቲያን ልጆች አንድ ኾነው እንዲነሡ አደራ እንላለን፤
- በድርጊት መርሐ ግብሩ መሠረት፣ የስምምነቱን ዓላማዎች የሚያጠናክር ሴሚናር፥ በአዲስ አበባ ሰባቱም ክፍላተ ከተማ እና በኦሮሚያ ክልል በኹሉም አህጉረ ስብከት ወረዳዎች ይደረጋል፤ ለክልላዊ መንግሥቱ ባለሥልጣናት ማብራሪያ ይሰጣል፡፡”
/ላእከ ሰላም ባያብል ሙላቴ፤ የሽማግሌው ኮሚቴ ሰብሳቤ እና የጃን ትምህርት እና ሰላም ለወገኔ ሲቪክ ማኅበር ፕሬዝዳንት/
