ግጭቶችና የሰው ሕይወት የማጥፋት ድርጊቶቹ ብሔር ተኮር ቢመስሉም ኢትዮጵያን የማተራመስ ዕቅዶች ናቸው — ፖለቲከኞች

November 1, 2020

(ኢዜአ)

 በኢትዮጵያ የሚስተዋሉ ግጭቶች በአንድ ማኅበረሰብ ላይ ያተኮሩ ቢመስሉም አገር የማተራመስ ዕቅዶች በመሆናቸው በጋራ መመከት ይገባል ተባለ።

–

በአገራዊ ሠላምና ወቅታዊ የፖለቲካዊ ጉዳዮች ከኢዜአ ጋር ቆይታ ያደረጉት የፖለቲካ ምሁራንና ፖለቲከኞች ከቅርብ ጊዜ ወዲህ በአገሪቷ የሚታዩ ሕገወጥ ተግባራት አገር ለማተራመስ የታቀዱ ሴራዎች ስለመሆናቸው ይስማማሉ።

–

የነፀብራቅ አማራ ድርጅት ሊቀ መንበር አቶ ቸርነት አንዳርጌ ግጭቶቹና የሰው ሕይወት የማጥፋት ድርጊቶቹ ብሄር ተኮር ቢመስሉም ዓላማቸው ‘አገር ማተራመስ ነው’ ይላሉ።

–

እነዚህ ድርጊቶች ሲያጋጥሙ የእኔ ብሄር አልተነካም ብሎ ዝም ማለት የዋህነት ነው ያሉት አቶ ቸርነት ድርጊቶቹን ከወዲሁ ልናስቆማቸው ይገባል ብለዋል።

–

በኢትዮጵያ ሠላም ማጣት የሚያተርፉ ቡድኖች በማኅበረሰቡ ውስጥ መኖራቸውንና ሕዝቡም እንደሚያውቃቸው የተናገሩት ደግሞ ፖለቲከኛው ዶክተር አንጋሳ አህመድ ናቸው።

–

በመሆኑን ሕዝቡ ሕገወጥ ግለሰቦችም ይሁን ቡድኖችን በጋራ መከላከል አለበት ነው ያሉት።

–

ግጭቶችን ለማስቆም በችግሮቻችን ዙሪያ የመወያየት ልምድ ማዳበርና በሠላማዊ መንገድ የመፍታት ባህልን ማሳደግ ይገባናል ያሉት ደግሞ ዶክተር አንዳርጌ ታዬ ናቸው።

–

ችግሮችና ቅሬታዎችን በንግግር ለመፍታት እየተጀመሩ ያሉ ብሄራዊ ምክክሮች ሊጠናከሩ እንደሚገባም አመልክተዋል።

–

የፖለቲካ ምሁሩ ዶክተር ዲማ ነገዎ በበኩላቸው በርካታ ችግሮችን አልፈው ወደ ዴሞክራሲ ስርዓት ለሚገቡ እንደ ኢትዮጵያ ላሉ አገራት የሚያስፈልገው ሁሉን አቀፍ ምክክርና ፖለቲካዊ ተሳትፎ ነው ይላሉ።

–

በኢትዮጵያ ሠላም ለማስፈንና ለማንም የማይወግን ዴሞክራሲያዊ ስርዓት ለመገንባትም ዜጎች በ’ያገባኛል’ ስሜት መሳተፍ እንዳለባቸው ተናግረዋል።