መንግሥት ቢቢሲ እና ሮይተርስን ጨምሮ 7 ዓለም አቀፍ የሚዲያ ተቋማት ትግራይ ክልል ገብተው ስላለው ሁኔታ መዘገብ እንዲችሉ ፈቃድ መስጠቱን አስታወቀ።
በትግራይ ክልል ያለውን ሁኔታ በተመለከተ በተለያዩ አካላት የሚሰራጩ መሠረተ-ቢስ እና እና በፖለቲካ ሴራ የተሞሉ ሐሰተኛ መረጃዎች መንግስት እንዳሳሰበውም መንግሥት ዛሬ ባወጣው መግለጫ አስታውቋል።
ለትግራይ ሕዝብ አስፈላጊውን ድጋፍ ለማድረግ የሚቀርበው ጥሪ የመንግሥትን ሉዓላዊ ሥልጣን እና ኃላፊነትን ከማንኳሰስ ከሚደረጉ የፖለቲካ ፍላጎቶች እና ወገንተኝነት የፀዱ ሊሆኑ እንደሚገባም መንግሥት አሳስቧል።
በትግራይ ክልል እየተከናወነ ስላለው የሰብአዊ ድጋፍ፣ ሰብአዊ ተደራሽነት፣ የሚዲያ ተደራሽነት፣ የሰብአዊ መብት ጥሰት ምርመራዎች እና በክልሉ የተቋቋመው ጊዜያዊ አስተዳድር እያከናወነ ስላለው ሥራም በመግለጫው ተብራርቷል።
የሰብአዊ ድጋፍን በተመለከተ በአብዛኛው ከሚነዛው የሐሰት ወሬ በተቃራኒ መንግሥት ከሀገር ውስጥ ከውጭ ድርጅቶች ጋር በሠራው የቅንጅት ሥራ እስካሁን በክልሉ ከሚገኙ 36 ወረዳዎች መካከል በ34 ወረዳዎች ውስጥ ለሚገኙ 3.1 ሚሊዮን ዜጎች ሰብአዊ ድጋፍ ማድረግ መቻሉን ገልጿል።
በክልሉ የሰብአዊ ዕርዳታ ለማድረግ ላመለከቱ እና ዓለም አቀፍ መመዘኛውን አሟልተው ለተገኙ 135 ዓለም አቀፍ ድርጅቶች እና ሠራተኞች በክልሉ ተንቀሳቅሰው የሰብአዊ ድጋፍ ሂደቱን እንዲያግዙ ፈቃድ መሰጠቱንም ገልጿል።
በአሁኑ ሰዓት 29 ዓለም አቀፍ ተቋማት በአስቸኳይ አስተባባሪ ኮሚቴ ሥር ተዋቅረው ክልሉ ውስጥ በሥራ ላይ ይገኛሉ ብሏል።
