March 2, 2023
በሃሚድ አወል
ኢትዮጵያ “ወጪ ለመቆጠብ” በሚል ምክንያት ዘግታቸው ከነበሩ ኤምባሲዎች መካከል፤ አምስቱን ዳግም ልትከፍት መሆኑን በውጭ ጉዳይ ሚኒስቴር ያሉ ሁለት የ“ኢትዮጵያ ኢንሳይደር” ምንጮች ተናገሩ። ኤምባሲዎቹን ለመክፈት ለገንዘብ ሚኒስቴር የበጀት ጥያቄ መቅረቡንም ምንጮቹ ገልጸዋል።
በድጋሚ ይከፈታሉ የተባሉት አምስት ኤምባሲዎች፤ በብራዚል፣ ኢንዶኔዢያ፣ ኩባ፣ ኮትዲቯር እና ዚምባቡዌ የሚገኙ ናቸው። በእነዚህ ሀገራት ይገኙ የነበሩት ኤምባሲዎች ባለፈው ዓመት ጥቅምት ወር እንዲዘጉ የተደረገው፤ “ወጪ ለመቆጠብ” እንደዚሁም “ኢትዮጵያውያን ዜጎች ያሉባቸውን አካባቢዎች ከግምት ውስጥ በማስገባት” እንደነበር ምንጮች አስረድተዋል።
Tweet
ምስላዊ መረጃ፦ ኢትዮጵያ ለኤምባሲዎች እና በውጭ ላሉ ህንጻዎች ግንባታ ስንት ብር ታወጣለች? ሰኞ
በጸደቀው የ2014 የፌደራል መንግስት በጀት፤ ለኤምባሲዎች እና በውጭ ሀገር ላሉ ህንጻዎች የዲዛይን
ጥናት፣ ግንባታና ዕድሳት 250 ሚሊዮን ብር ተመድቧል።
Translate Tweet
Visual information: How much money does Ethiopia spend on building
embassies and foreign buildings? In the 2014 Federal Government
Budget approved on Monday; 250 million Birr has been allocated for
design research, construction and renovation of embassies and
buildings abroad.
17 Retweets 3 Quote Tweets 19 Likes
የውጭ ጉዳይ ሚኒስቴር በአምስቱ ሀገራት ያሉትን ኤምባሲዎች የመዝጋት እርምጃ የወሰደው፤ ጠቅላይ ሚኒስትር አብይ አህመድ ኢትዮጵያ በውጭ ሀገር ያሏትን ኤምባሲዎች እና ቆንስላ ጽህፈት ቤቶች ቁጥር መቀነስ እንደሚገባት ካሳሰቡ በኋላ ነው። አብይ ከአንድ አመት ከስምንት ወራት በፊት በህዝብ ተወካዮች ምክር ቤት ቀርበው በሰጡት ማብራሪያ፤ “እኛ ዶላር በየቦታው ከምንበትን፤ ለጊዜውም ቢሆን ለስድስት ወርም ለዓመትም ቢሆን፤ አሁን ካሉን ኤምባሲዎች ቢያንስ ሰላሳው መዘጋት አለበት” ሲሉ ወጪ ለመቆጠብ የሚዘጉ ኤምባሲዎች እንዳሉ ተናግረው ነበር።
ጠቅላይ ሚኒስትሩ ይህን ከተናገሩ ጥቂት ወራት በኋላ በውጭ ሀገራት ያሉ የኢትዮጵያ ኤምባሲዎች እና ቆንስላ ጽህፈት ቤቶች ተዘግተው ሰራተኞቻቸውም ወደ ሀገር ውስጥ ተመልሰዋል። ኢትዮጵያ ዳግም ኤምባሲ ለመክፈት በዝግጅት ላይ ካለችባቸው አምስት ሀገራት ያላትን ግንኙነት፤ ላለፈው አንድ ዓመት ከመንፈቅ ስታከናውን የቆየችው በሀገር ውስጥ ባሉ ዲፕሎማቶቿ አማካኝነት ነበር።
ተቀማጭነታቸው በአዲስ አበባ ሆነው ለአምስቱ ሀገራት በአምባሳደርነት የሚያገለግሉ (non-resident ambassadors) ዲፕሎማቶች በፕሬዝዳንት ሳህለወርቅ ዘውዴ ሹመት አማካኝነት የተሾሙት ደግሞ ከአንድ ዓመት በፊት ነበር። በዚህም መሰረት ፕሮፌሰር ፈቃዱ በየነ የኢንዶኔዢያ፣ ዶ/ር ገነት ተሾመ የኩባ፣ አቶ ጣፋ ቱሉ የብራዚል፣ ወይዘሮ ሽታዬ ምናለ የኮትዲቯር እንዲሁም አቶ ረሻድ መሐመድ የዚምባቡዌ አምባሳደር ሆነው ተሹመዋል።
Thread
ትላንት ከተሾሙት አምባሳደሮች የተወሰኑት፤ ተቀማጭነታቸው በሀገር ውስጥ እንደሚሆን ውጭ ጉዳይ
ሚኒስቴር አስታወቀ። የሚኒስቴሩ ቃል አቃባይ ዲና ሙፍቲ፤ ሹመቱ “ዲፕሎማሲያዊ ሙያን መሰረት ያደረገ
ነው” ብለዋል።
ለዝርዝሩ፦ https://ethiopiainsider.com/2022/5696/
Translate Tweet
ይህንን ሹመት ተከትሎ በወቅቱ የውጭ ጉዳይ ሚኒስቴር ቃል አቃባይ የነበሩት ዲና ሙፍቲ በሰጡት መግለጫ፤ ተቀማጭነታቸው በአዲስ አበባ የሚሆኑ አምባሳደሮች ወደ ተወከሉበት ሀገር አስፈላጊ ሲሆን እየተመላለሱ እንደሚሰሩ አስታውቀው ነበር። በውጭ ጉዳይ ሚኒስቴር ያሉ የ“ኢትዮጵያ ኢንሳይደር” ምንጭ፤ “ሀገሪቷ ኤምባሲዎች home based ሆነው እንዲሰሩ ሌላ መዋቅር ፈጥራ ነበር። እርሱ አሰራር አሁን ውጤታማ ሊያደርግ ስላልቻለ home based ተብለው የነበሩት ወደ ቦታቸው እንዲመለሱ እየተደረገ ነው” ሲሉ አዲሱን የመንግስት ውሳኔ አስረድተዋል።
አንድ ስማቸው እንዲጠቀስ ያልፈለጉ የውጭ ጉዳይ ሚኒስቴር አመራር፤ ውሳኔው ከአንድ ወር በፊት የተወሰነ መሆኑን ለ“ኢትዮጵያ ኢንሳይደር” ተናግረዋል። በዚህ ውሳኔ መሰረት በአምስት ሀገራት የነበሩ ኤምባሲዎች ዳግም የሚከፈቱት፤ “ስራው ውክልና ስለሚፈልግ፤ ኢትዮጵያም በኤምባሲ መወከል ስላለባት መሆኑን” አብራርተዋል። (ኢትዮጵያ ኢንሳይደር)