<ትግራይ እያለቀሰች ነው ፤ በትግራይ ክልል የማይለቀስበት ቤት የለም > – ብፁዕ ወቅዱስ አቡነ ማትያስ

October 15, 2023 

<ትግራይ እያለቀሰች ነው> – ብፁዕ ወቅዱስ አቡነ ማትያስ

የኢትዮጵያ ኦርቶዶክስ ተዋሕዶ ቤተ ክርስቲያን ፓትርያርክ ብፁዕ ወቅዱስ አቡነ ማትያስ <ዛሬ በትግራይ ክልል የማይለቀስበት ቤት የለም> ሲሉ ተናግረዋል።

ፓትርያርኩ ይህን ያሉት በትግራይ ክልል ለሁለት ዓመታት በተካሄደው ጦርነት ሕይወታቸውን ላጡት እየተከናወነ ላለው የሀዘን ሥነ ሥርዓትን አስመልክቶ ዛሬ ጥቅምት 3 ቀን 2016 ዓ.ም ባወጡት መግለጫ ላይ ነው።

<< በትግራይ ክልል እየተዘከሩ ላሉት ወገኖች በእጅጉ ማዘናችንን እንጋልጣለን >> ያሉት አቡነ ማትያስ <ይህ እንዳይመጣ ብዙ ተማፅኖ ስናቀርብ ነበር> ሲሉ አስታውሰዋል።

ይሁንና <ሽበት እና ክህነት የማይከበርበት ዘመን ላይ ደርሰን ለዚህ ሀዘን በቅተናል> ሲሉ ወቀስዋል።

የፓትርያርክ አቡነ ማትያስ መልዕክት ሲቀጥል ታሪክ መስራት የሚችሉ የሀገር ተስፋዎች በእሸት በመቅረታቸው < በሀዘን በተሰበረ ልብ > በመሆን ለነፍሳቸው እረፍትን ተመኝተዋል።

<በኀዘን የተጎዳችሁ አባቶችና እናቶችም ይህ ቢሆን ኖሮ እያላችሁ ራሳችሁን እንዳትጎዱ፤ የእናንተ መጎሳቆል የሞቱትን ቀና አያደርግም> ያሉት አቡነ ማትያስ << ልባችሁን እንድታበረቱ እናሳስባለን ምክንያቱም መቃብር መጨረሻችን ያልሆነ የትንሣኤ ሕዝብ ነን> ሲሉ አባታዊ መልዕክታቸውን አስተላልፈዋል።

የሰላም ዋጋ መሆኑን ካለፉት የፈተና ጊዜያት በመማር <ከጦርነቱ የተረፉት በሰላም የመኖር መብታቸው እንዲከበር፣ አረጋዊያን በክብር እንዲጦሩ፣ ህፃናት በትምህርት እንዲያድጉ> ጥሪ አስተላልፈዋል። ዛሬ ጥቅምት 3 ቀን 2016 ዓ.ም <የሰማዕታት የሃዘንና የክብር ቀን ሥነ-ስርዓት>  በትግራይ ክልል ሲከናወን ውሏል።