ሰበር ዜና:- በቂሊንጦ ማረሚያ ቤት የእሳት ቃጠሎ ተነሳ

(EMF) በአዲስ አበባ መስተዳድር በከፍተኛ ጥበቃ ስር ያለው ቂሊጦ እስር ቤት ከትላንት አርብ ምሽት ጀምሮ እስከ ዛሬ ቅዳሜ ንጋት ድረስ በእሳት እያጋየ መሆኑን ለማረጋረጥ ችለናል። በርካታ የፖለቲካ እስረኞችን ያጎረው ይህ እስር ቤት በምን ምክንያት እንደጋየ እና ቃጠሎውን ማን እንዳነሳው እስካሁን አልታወቀም። በስፍራው ከፍተኛ ተኩስ እሩምታ እንዳለ ግን የአካባቢው እማኞች ተናግረዋል።

ከሳምንት በፊት በቂሊንጦ ያለአግባብ የታሰሩት የፖለቲካ እስረኞች እዚያው ሆነው የሃዘን ቀን ማወጃቸው አይዘነጋም። አቶ በቀለ ገርባ፣ ደጀኔ ጣፋ፣ አዲሱ ቡላላ፣ ጉርሜሳ አያኖ፣ ዮናታን ተስፋዬ፣ ፍቅረማሪያም አስማማው፣ መቶ አለቃ ማስረሻ ሰጤ አበበ ኡርጌሳ፣ ብርሃኑ ተክለ ያሬድ እና የድምጻችን ይሰማ ወገኖቻችን በዚህ እስር ቤት ነው የሚገኙት።

ቅሊንጦ እስር ቤት በ3 ዞኖች የተከፈለ ሲሆን፣ ለሃገራችንና ለሕዝቧ መብት ነጻነት እኩልነት ፍትሕ በመታገላቸው ብቻ በአገዛዙ እንደ ወንጀል ተደርጎባቸው የታሰሩት ወገኖች ቁጥር እጅግ ብዙ እንደሆነ ይነገራል።

በአሁን ሰአት የቅሊንጦ አካባቢ በአጋዚ ተከብቦ ከጥይት ድምጽ ባሻገር የሚሰማ ነገር የለም። ወደ ስፍራውም መንቀሳቀስ አይቻልም። ወደ እብደት የተቀየረው የሕወሃት አመራር ምናልባት በዚህ አሳብቦ የህሊና እስረኞቹን ሊጨርሳቸው ይሆናል የሚሉ ወገኖች ጥቂት አይደሉም።